Kaso nga murder ang posible pangatubangon sang suspetsado nga nagpatay sa isa ka lalaki sa sulod sang salakyan sa Purok Tumpok, Brgy. Zone 15 ciudad sang Talisay nagligad nga Nobyembre 5.
Sa interview sang Bombo Radyo Bacolod kay Police Staff Sgt. Edmundo Jomocan Jr., imbestigador sang Talisay City Police Station, padayon pa nila nga ginapadalman kun sin-o ang nag-arkila sang Toyota Vios kun sa diin nakit-an si Jethro Baldecasa, 28-anyos sang Purok Magsungay, Brgy. Singcang-Airport, Bacolod City, nga tadtad sang bala.
Nahibaluan nga rent a car ang kotse kag gin-arkilahan sang isa ka persona sang Oktubre 31, ginbalik makaligad ang duha ka adlaw apang ginresume ang rental sini kag wala nabalik tubtob sang natabo ang insidente.
Santo man sa record sang rent a car service, indi si Jethro ang nag-arkila sang salakyan.
Suno kay Jomocan, mangin kabahin sa gihapon sang ila imbestigasyon ang nag-arkila sang kotse.
Dugang pa sini nga may yara na sila sang impormasyon sa tawo nga nag-arkila apang indi pa nila mapalayag ang pangalan sa karon.
