Nagsaka na sa halos 800 ka indibidwal ang kumpirmado nga ginbawian sang kabuhi samtang linibo gihapon ang nagapabilin nga missing sa makamamatay nga pagbaha kag pagkatiphag sang duta sa Nepal-Tibet border.
Nag-ugat ang trahedya sa pagtiphag sang isa ka dako nga glacier gikan sa Himalayas sang Miyerkules.
Kapin sa 3,000 ka mga tawo ang numero sang mga nadula sa Nepal, kag sa rehiyon sang Tibet sa China, sa diin pila sa mga bangkay ang na-anod na sa kaingod nga pungsod India.
Lakip sa ginapangita subong amo ang masobra 900 ka mga trabahador gikan sa 11 ka hydropower projects sa Nepal nga nalubong sa idalom sang madamol nga lutak kag mga debris.
Naglunsyar na sang malapad nga rescue operations ang gobyerno sang Nepal gamit ang kapin 19,000 ka mga security personnel kag 16 ka helicopter agud mapangita ang mga biktima sa pihak sang malain nga paniempo.
Nagpadala man sang bulig kag eksperto nga grupo ang India kag China, samtang nag-abot naman ang minilyon nga dolyar nga humanitarian aid sang United Nations kag sang nagkalain-lain nga pungsod.
Ginabulubanta masobra na sa $4 billion ang kabug-usan nga kahalitan sa imprastraktura tuga sang kalamidad.
