Panawagan sang labor group nga tutukan sang mga mamalidha ang pagpaayo sa kuryente kag transportasyon nga mas may dako nga kontribusyon sa productivity kag competitiveness sang pungsod sangsa ang pagbuhin sa holidays.
Sa interview sang Bombo Radyo Bacolod kay Josua Mata, secretary general sang Sentro ng mga Nagkakaisa at Progresibong Manggagawa (SENTRO), imbes nga buligan sang gobyerno ang mga mamumugon, ini ang mas ginapabudlayan pa.
Pahayag sini nga tuman ka lala ang traffic sa Metro Manila kun sa diin nagadangat sa anom ka oras ang ma-uyang sang mga trabahante sa byahe pa lamang magluwas pa sa walo ka oras nga regular nga pagtrabaho.
Gani dapat nga isa sa mga una solusyonan sang mga Senador ang pagpaayo sa sistema sang transportasyon, sangsa ang ginaduso ni Senate President Francis ‘Chiz’ Escudero nga pagbuhin sang holidays nga ginapatuman sa pungsod.
Panindugan pa ni Mata nga indi man dako ang epekto sang pila ka tion nga holiday sa pagpaayo sang produksyon kag competitiveness sang Pilipinas batok sa iban nga pungsod.
Suno diri, mas madamo ang mauyang nga oras sa pag-asenso sang Pilipinas kun madamo ang nagakastranded sa trapiko.
Isa pa sa dako ang epekto sa produksyon amo ang kuryente kun sa diin ang presyo ang world class sa pagkamahal apang ang serbisyo ang nagapabilin nga pang third-world country.
Suno kay Mata, indi na dapat paghilabtan pa ang gamay nga pahuway sang mga mamumugon bangod ang makadali nga pahuway ang makabulig man sa pagpasanyog sang kalidad sang trabaho.
