Ginalauman sang mga manugbaligya sang bulak sa ciudad sang Bacolod nga magadamo na ang kustomer sa masunod nga semana bangud nagahilapit na ang tigkalalag.
Ini apisar pa nga sirado ang mga sementeryo halin Oktubre 29 tubtub Nobyembre 2, santo sa mandu sang Inter-Agency Task Force on Emerging Infectious Diseases.
Sa interview sang Bombo Radyo kay Rosalinda Pactao-in nga nagabantay sang flower shop sa likod sang BAYS Center, indi pa tuman kadamo ang nagabakal sa karon apang ginalauman nga mangin mabakal ang bulak sa weekend.
Tinalikdan nga semana suno kay Pactao-in, madamo ang order nga bulak para sa patay kun sa diin set ang ginapahimo, apang nagpuas na ini sa karon.
Ang isa ka set nga ginabutang sa idalom kag ibabaw sang lungon ang nagabili sang P6,000.
Ang kalabanan nga ginabakal para sa patay suno sa flower vendor amo ang malaysian mums kun sa diin ang tatlo ka stem sini, sa anuman nga kolor, ang nagabili sang P100.
Ang isa naman ka dosena ang nagabili sang P400.
Ang anthorium naman ang nagabili sang P450 kada dozen kun small kag P500 kada dozen kun large.
May nagahalad man sang rose sa ila minatay kun sa diin ang set sini ang nagabili sang P800 kag P400 ang isa ka dosena, kag may mga tinion man nga ginasimpon ini sa iban nga bulak.
Mabakal naman ang bulak nga nabutang na sa basket bangud ang gamay nga basket ang nagabili lamang sang P150 kag maigo gid sa budget sang mga bumalakal.
Ang supply sang bulak nga nagaabot sa Bacolod ang nagikan sa Baguio City kag Cebu.
Sang tinalikdan nga naglabay ang Bagyo Lanie, apektado man ang supply sang bulak kun sa diin laya na ang iban sang nakadungka sa Bacolod.
Nagapa-ayo man ang supplier agud indi mamierdihan ang nagakumpra.
