Padayon pa ang imbestigasyon sang La Carlota City Police Station angot sa kamatayon ni Pearl Joy Galve.
Madumduman nga ang nagaka-agnas na nga bangkay sang 15 anyos nga dalagita ang nasapwan kahapon, Agosto 14, sa sulod sang kampo sang tubo sa Hacienda San Roque, Brgy. Cubay, La Carlota City, Negros Occidental.
Sa interview sang Bombo Radyo Bacolod kay Police Lt. Col Lymel John Pasquin, hepe sang La Carlota City Police Station, ginpaidalom na sa autopsy examination ang lawas sang dalagita subong nga adlaw, kag indi pa matumod kun san-o maggwa ang resulta.
Sa autopsy result man matumod kun pila ka adlaw na sa lugar ang bangkay.
Nagalaom sila nga makakuha sang ebidensya ang forensic group sang Negros Occidental Police Provincial Office (NOCPPO) partikular na sa kun ano ang kinamatay sang biktima kag kun ini ang ginhimuslan.
Ginsaysay sini nga gikan sa main highway, may dalan pa nga indi sementado kag sarang malabayan sang tricycle sa tunga sang kampo kun sa diin nasapwan ang bangkay.
Ini ang kapin 500 tubtob 700 metros pasulod, samtang ginkan sa dalan, kapin 200 metros pa pasulod sang kampo ang lokasyon sang lawas.
Suno diri, napanimahuan ini sang mga trabahante sang hacienda kag sang gin-usisa ila nakita ang puti nga sapatos, nga gilayon man nga ginreport sa kapulisan.
Paathag ni Pasquin nga on progress pa ang imbestigasyon kag sila ang nagakoordinar man sa Bacolod Police Station 9, nga nagabulig sa pag-imbestigar humalin sang namissing si Pearl Joy sang Hulyo 29 sa Barangay Sum-ag, Bacolod City.
Isa sa ginalantaw nila nga maretrieve amo ang mga CCTV footage nga mahimo nakacapture sa biktima kag kun sin-o man ang kaupod sini antes madula.
Nagapanawagan man si Pasquin sa mga mahimo may ihibalo sa insidente, nga makig-angot sa ila agud makabulig sa pagsolbar sang krimen.
Samtang nagakoordinar naman sa La Carlota City Police Station ang Bacolod Police Station 9 angot sa kaso ni Pearl Joy Galve.
Sa interview sang Bombo Radyo Bacolod kay Police Captain Michael Tuburan, station commander sang Bacolod Police Station 9, ang La Carlota City Police Station amo ang nagakapyot sang kaso bangod sa ila area of responsibility nasapwan ang bangkay.
Pasalig ni Tuburan, nga tanan nga matipon nila nga mga impormasyon natuhoy sa kaso ang ila man nga iga-endorso.
