Gin-athag sang alkalde sang banwa sang La Castellana nga wala ini sang plano nga magpapili bilang bise gobernador sang probinsya sang Negros Occidental bangud luyag sini nga tutukan ang mga programa nga iya naumpisahan sa pagpasanyog sang La Castellana.
Sa interview sang Bombo Radyo kay La Castellana Mayor Rhumayla Manguilimutan, wala ini nakahibalo nga may yara sang nagalapta nga esturya kun sa diin naggwa ang pangalan sini nga isa sa magapapili bilang bise gobernador sang probinsya apang wala man sini ginasira ang pirtahan para sa ini nga oportunidad.
Suno diri, sa karun mas pilion sini nga padayunon ang naumpisahan na sini nga mga programa kag tutukan ang pagsanyog sang banwa.
Dugang pa sini, madamo sang may luyag kag kwalipikado nga ibutang sa posisyon bilang bise gobernador sa mga miyembro sang United Negros Alliance kag yara na sa mga pumuluyo kun sin-o man ang ila luyag nga pilion.
Para kay Manguilimutan, maayo ang pagpamuno ni Vice Governor Jeffrey Ferrer ilabi na sa mga programa nga natukod kag natuman sini sa kada banwa kag ciudad sa probinsya.
Samtang, ginklaro man sini nga ang paglibot ni Victorias Mayor Javi Benitez sa probinsya may yara sang iban nga tinutuyo kag indi ang pagkontra sa gobernador.
Ini kasunod sa nagalapta nga esturyahanon nga may plano si Benitez nga magpapili bilang gobernador sang probinsya.
