Nakaplastar na ang mga programa sang La Castellana Municipal Fire Station para sa bulan sang Marso, ang Fire Prevention Month.
Suno kay Senior Fire Officer 3 Eulogio Patriarca, acting Municipal Fire Marshall sa La Castellana Municipal Fire Station, nga naangot sa mga programa nga ginlatag sang Regional Director panaog sa Bureau of Fire Protection – Negros Occidental, naplastar na nila ang mga programa nga patigayunon para sa bilog nga bulan sang Marso.
Ini ang umpisahan sa Marso 1 pinaagi sa Motorcade nga paga-updan sang mga responders kag stakeholders.
Kadungan sini may mga aktibidades man kaangay sa massive campaign kag assessment sa mga hazard areas sa La Castellana.
Sila ang magapatigayon man sang mga fire drills kag symposium sa mga eskwelahan kag ini ang ginapatigayon indi lamang sa bulan sang Marso kundi sa bilog nga tuig.
Dugang pa ni Patriarca nga sila ang nagapatigayon man sang rekorida sa mga Barangay kag may mga post sa social media may kaangtanan sa mga tikang sa paglikaw sang sunog.
Isa sa panugyan sang BFP Negros Occidental nga kalimtan na si Marites kag paminsaron si EDITH nga nagakahulugan Exit Drill In The Home nga amo sa karun ang ila mabaskog nga ginakampanya.
Tuyo man sang BFP-La Castellana nga liwat maghuman sang Community Fire Auxillary Group bilang kabulig sa mga Barangay.
Suno pa diri, ang Municipal Government ang may plano naman nga maghuman sang sub station sang BFP sa Barangay Cabacungan nga ila ginatarget nga matukod sa 1st quarter subong nga tuig.
Paathag ni Patriarca, nga ang mga na-identify nila nga mga Hazard Areas amo ang mga lugar nga madamo sang pamalay kaangay sa mismo nga banwa kasubong man ang mga lugar nga malayo kag mabudlay sudlon sang mga Fire Personnel sa tion sang emerhensya.
Ang Sub Station sa Barangay Cabacungan amo ang magaserbe nila nga pamaagi, agud nga maaddress ang kabudlayan sa pag-operar partikular na sa nabukid nga bahin sang banwa sang La Castellana.
Sa karun, ang La Castellana Fire Station ang may duha ka serviceable nga fire trucks kag 14 ka personnel.
Suno kay Patriarca, ang labi nga ginakinahanglan sa karun sang La Castellana Fire Station amo ang dugang nga Fire Trucks kag Ambulance para sa Emergency Medical Services bangod ang BFP ang wala lamang nakafocus sa mga fire incidents kundi may mandato man sa pagresponder sa tanan nga sahi sang kalamidad kag mga emerhensya.
