Padayon ang pagpanawagan sang Local Government Unit sang La Castellana sa mga Kanlaon eruption evacuees nga nagpauli na sa ila nga puluy-an nga magbalik sa evacuation center bangud wala pa sang clearance nga makapauli na ang mga ini.
Sa interview sang Bombo Radyo Bacolod La Castellana Municipal Disaster Risk Reduction Management Office head John De Asis, kapin 45 ka pamilya ang nagpauli nga wala sang pahanugot sang LGU kag sa karun nagapanawagan ang banwa sa mga ini nga magbalik sa evacuation centers.
Suno kay De Asis, nagakoordinar na sila sa Barangay agud mapabalik ang mga ini.
Nahibaluan nga may yara lamang sang window period nga ginhatag ang Office of the Civil Defense agud nga makabalik ang mga ini sa lugar agud nga manguma apang nagabalik lamang sa evacuation centers.
Ginpahayag man sini nga ang nalakip sa ayuda ang mga yara sa evacuation centers apang ang mga nagpauli ang indi na mahatagan.
Ginapangitaan na sa karun sang banwa sang solution ang ginaproblema sang mga evacuees kun ngaa nagpauli sa ila lugar kag ini ang kamahal sang pamasahe halin sa evacuation centers padulong sa mga eskwelahan sang mga estudyante.
Samtang ginpahayag ni Office of the Civil Defense – Negros Island Region Director Donato Sermeno III nga may yara sang patigayunon ang OCD kaupod ang mga Local Government Units nga apektado sang Mt Kanlaon eruption nga conference.
Ang conference ang updan man sang national government officials kag ini ang patigayunon sa ciudad sang Bacolod.
Suno kay Sermeno, diri pagaestoryahan ang pagdevelop recovery plan nga may katuyuan sa pagtukod sang permanente nga relocation site para sa mga Internally Displace Persons (IDPs) bangud sa paglupok sang Bulkan Kanlaon.
