Indi mag-untat ang mga kapulisan sa banwa sang La Castellana tubtob nga ma-evacuate ang tanan nga pumuluyo sa anum ka mga barangay nga nalakip sa four-to-six-kilometer danger zone sang Bulkan Kanlaon.
Sa interview sang Bombo Radyo kay Police Major Rhojn Darell Nigos, hepe sang La Castellana Municipal Police Station, nagapadayon sa karun ang ila ginapatigayon nga force evacuation sa four to six km danger zone kasubong man ang mga relief operations sa tagsa ka mga evacuation centers.
Suno sa iya, ila gina-isa-isa ang mga pamalay kag ginapaintindi sa mga ini ang ila nga tinutuyo nga masiguro nga mangin luwas sang tagsa-tagsa sa katalagman.
As of 2:00 am, may yara sang 1,957 ka pamilya ukon kapin 6,367 ka mga indibidwal nga nagatinir sa siyam ka mga evacuation centers.
Nagapangabay si Nigos sa mga tagpalamati nga magbulig sa pagpangamuyo para sa kaluwasan sang tanan.
Samtang, Kapin 2,400 ka mga indibidwal ukon 361 ka pamilya ang nagatinir sa karun sa St. Vincent Highschool sa banwa sang La Castellana bangud sa paglupok sang Bulkan Kanlaon.
Sa interview sang Bombo Radyo kay John Rey Calataro, camp manager sang SVHS camp, aminado ini nga kulang ang mga classrooms para sa kadamuon sang mga evacuees, nga ginalauman nga madugangan pa, rason kun ngaa ginaplanuhan nga buksan man ang elementary school sa Barangay Lalagsan agud mag-accomodate sang mga pumuluyo.
Kumpleto naman ang tanan nga supplies kag panginahanglanon sang mga evacuees.
