Ginbuksan na ang labing una nga Bacolod Electric Vehicle Summit sa Ayala Malls Capitol Central kahapon sang hapon.
Nagtambong sa summit sanday Vice Mayor Claudio Jesus Puentevella, Councilor Jude Thaddeus Sayson, Councilor Al Victor Espino, Pao Sy, Atty. Caesar Distrito, Bobby Rojas kag Executive Assistant Mona Dia Jardin nga tiglawas sang Bacolod LGU.
Ini ang inisyatibo ni Bacolod City Lone District Alfredo “Albee” Benitez.
Sa mensahe ni Cong. Albee, ginhatagan sini sang importansya ang paggamit sang e-vehicles bilang public transportation sa ciudad para sa sustainability kag matinlo nga hangin.
Suno diri, makabulig ang e-vehicles sa pagpanubo sang gastos sa operasyon kag maintenance sang mga driver kag operators sang public transportation.
Ini paagi sa nagakaigo nga imprastraktura, financing kag pagbuligay sang panguluhan kag pribado nga sektor agud mas mangin accessible ang electric mobility sa mga operator kag driver samtang ginapabilin ang affordable nga plete para sa mga pasahero.
Ginpasiguro man sang Kongresista nga kinahanglan makabenepisyo ang tanan sa pag-shift sang mas moderno nga transportasyon.
Suno sa iya, indi dapat sa subong lamang mabatyagan ang mga benepisyo sa mga kaangay nga pagbag-o kundi mangin sa palaabuton.
