Ginplanuhan na nga daan sang pamunuan sang Bacolod City National High School ang pagpatigayon sang programa para sa una nga adlaw sang School Year 2022-2023.
Sa interview sang Bombo Radyo Bacolod kay Richard Gelangre, principal sang Bacolod City National High School, nangin madinalag-on ang pagpatigayon sang flag ceremony kag program sa una nga adlaw sang klase.
Suno kay Gelangre may yara sang mga absent apang mas madamo ang present apisar nga nag-ulan.
Pila sa mga problema nga nakita sang mga ini amo ang madamo sang mga Grade 7 students ang wala makatultol sang ila nga classrooms.
Samtang ang mga kakulang sang suga sa mga kwarto kag iban pa nga kabudlayan ang naresolve man nila gilayon.
Mapatigayon man ang Bacolod City National High School sang psycho-social activities agud nga indi magulpihan ang mga kabataan bangud kinahanglan sang mga ini ang adjustment matapos nga masobra duha ka tuig nga wala nagpatigayon sang face-to-face classes ang mga eskwelahan bangud sa pandemya.
Ginlauman man sini nga 100 percent ang attendance sang mga manunudlo bangud crucial sa mga ini ang pagreport sa una nga adlaw sang klase.
Ginpahayag man sang principal nga ginahibalo sa karun sang mga teachers ang learners gap sang mga estudyante agud nga amat-amat man nga ma-address.
