Nangin madinalag-on ang labing una nga PelikulAgrario 2026 – Negros Island Region sang Department of Agrarian Reform and Regional Film Festival nga ginhiwat sa Bacolod City.
Ini ang ikaduha na nga tuig sang programa Nationwide, apang karun lamang na-implementar sa bag-o nga Negros Island Region.
Sa interview sang Bombo Radyo Bacolod kay Jose Jenil Demorito, Assistant Secretary for External Affairs and Communications Operations Office sang DAR, tinutuyo sang programa nga mahatagan sang pagkilala ang talento sang mga estudyante sa film making, kasubong man ang estorya sang mga mangunguma, Agrarian Reform Beneficiaries, kooperatiba, kag ARB associations.
Pinaagi sini, ginalauman man nila nga mangin inspirasyon partikular na sa mga kabataan ang ‘true to life’ stories sang mga mangunguma.
Suno kay Demorito, luyag nila nga makonekta ang mga mangunguma nga liyabi sa food security sang pungsod, sa mga masunod nga henerasyon.
Tinutuyo sang programa nga mapanugyan sa mga kabataan ang importansya sang pagpanguma agud mapabilin ang seguridad sa pagkaon sa Pilipinas.
Ginapasalig man sang DAR sa mga kabataan ang bulig sang ahensya sa pagpanguma, partikular na ang paghatag sang farm machineries.
Suno diri, dapat mapanas na ang nakaandan nga hurubaton nga ‘farming life is never fun,’ kag ini ang mabuslan sang ‘farming is fun.’
Ang PelikulAgrario 2026 – NIR ang ginpasakupan sang anom ka entries gikan sa apat ka mga eskwelahan gikan sa Siquijor, Negros Oriental, kag Negros Oriental.
