Nagalaom ang labor advocate nga ma-anunsyar ni President Ferdinand “Bongbong” Marcos Jr. sa iya State of the Nation Address (SONA) ang paghatag sanfg ‘wage increase’ sa iban nga rehiyon kalakip na sa Western Visayas.
Sa interview sang Bombo Radyo Bacolod kay Wennie Sancho, secretary-general sa General Alliance of Workers Association (GAWA), ginalauman na nila nga mangin prayoridad sa SONA ang issue sa kurapsyon, apang panawagan sini nga indi baliwalaon ang mga mamumugon.
Dugang pa sini nga luwas sa wage increase, mas kinahanglan sang mga mamumugon sang economic package ilabi na nga padayun ang pagnubo sang purchasing power sang mga empleyado.
Ini resulta man sa nagalala nga inflation, kag pagtimbook sang mga presyo sang balaklon matapos nga nagsaka ang presyo sang gatong tuga sang nagapadayun nga tensyon sa middle east.
Pahayag ni Sancho nga makabig nga report card ang SONA kun sa diin patpaton sang presidente ang mga napatuman, lakip na ang improvement sa employment rate.
Apang dapat suno diri nga mapakita kun ano ang matuod-tuod nga sitwasyon sang Pilipinas.
Isa sa matawag sini nga report card lamang amo ang pagdeklarar sang World Bank sa Pilipinas bilang upper-middle income country, nga para sa ila wala sang kamatuoran.
Ginhalimbawa man sini ang deklarasyon sang mga ekonomista nga nagapahayag nga ang ideal income para sa family of five sa kada bulan ang P13,000 lamang.
Apang sa kamatuoran, ang nasambit nga income ang indi makaigo sa pamilya nga may lima ka miyembro.
Pahanumdom sini nga P1,200 per day ang makabig living wage, apang ini ang sa karun makabig lamang nga damgo.
Ginakwestyon man sini ang pagtawag sang gobyerno sa labor sector bilang social and primary economic force, apang wala man nila ginahatagan sang balor, kag kun pasakaan gid man ang sweldo ini ang halos katumbas lamang sang kambyo ukon sensilyo.
