Nagapanindugan ang labor advocate nga dako pa gihapon ang lalagson antes mabatak ang losses sa purchasing power sang mamumugon apisar sa pagpatuman sang wage increase sa private sector workers.
Sa interview sang Bombo Radyo Bacolod kay General Alliance of Workers Association (GAWA) Secretary General Wennie Sancho, wala na sang mahimo bangod P33 tubtob P40 lamang ang naaprubahan nga wage increase.
Apang panindugan sini nga kulang ang ginrekomendar sang Regional Wage Board bangod sa tuman nga pagmahal sang basic goods kag services, ang ginsaka sa sweldo ang matabon lamang sa kamahal sang balaklon.
Suno kay Sancho, ginpanindugan sini mismo sa public hearing sang Oktubre 21 nga P110 ang kinahanglan agud lamang marestore ang purchasing power sang mga mamumugon, nga indi pa sini matawag nga wage increase, apang wala pa katunga ang na-aprubahan.
Dugang pa sini nga dapat progressive ang wage increase ukon nagataas kada tuig, apang sa nakaligad nga Wage Order sila ang naka-aprubar sang P50, nasundan sang P30 kag ang karun nga P33 tubtob P40.
Panindugan sini nga dapat nagasaka kada tuig ang saka sa sweldo bangod wala man nagapanaog ang bili sang balaklon kag serbisyo.
Suno diri mas maayo kuntani kun bisan P80 tubtob P90 na lamang ang ginsaka.
Dugang pa ni Sancho nga kuntani isa sa ginatutukan amo ang napasar na sang Senado nga P100 legislated wage increase para sa bilog nga pungsod.
Apang ini ang nagakinahanglan sang kaangay nga hagna gikan sa House of Representative para sa joint legislation.
Apang ini ang natunaw na sa Kongreso kag ginhatagan lamang sang paltik nga paglaom ang mga mamumugon.
Suno diri, kun magsalig lamang sa Regional Wage Board, sensilyo lamang ang mahatag nga dugang nga sweldo sa mga workers.
