Gin-athag sang labor advocate nga siya ang pabor sa wage increase apang ini ang nagakahangawa sa mangin epekto sa ekonomiya inkaso nga ipasar ang ginaduso nga P200 daily across-the-board salary increase sa pribado nga sektor.
Sa interview sang Bombo Radyo Bacolod kay General Alliance of Workers Association (GAWA) Secretary General Wennie Sancho, welcome development para sa iya ang hagna nga napasar sa Kamara kun ini ang makahatag sang kaayuhan para sa mamumugon.
Apang pahanumdom sini nga magacontradict diri ang Republic Act 6727 ukon Wage Rationalization Act nga nagahatag sang gahom sa Regional Tripartite Wages and Productivity Boards (RTWPBs) sa pagdesisyon sa ipatuman nga wage increase.
Paathag sini nga indi mahimo nga imando sang Kongreso nga ipatuman sa regional level ang P200 nga wage increase bangod kinahanglan respetuhon ang desisyon sang Regional Wage Board sa paglegislate sang sweldo.
Dugang pa sini nga sa pagsulundan, indi na bag-o nga magapamatok ang management sector.
Suno diri, mahimo masarangan sang dalagkuan nga negosyante ang P200 nga saka sa pang-adlaw adlaw nga sweldo, apang ini ang indi masarangan sang micro, small and medium business enterprises.
Bilang anay representative sang labor sector sa Regional Wage Board, paathag ni Sancho nga P55 lamang ang nakita sini nga pinakamataas nga pagpasaka sang sweldo.
Dugang pa niya nga mahimo magresulta sa economic catastrophe kun mapatuman ang P200 nga increase sa sweldo bangod ang magagmay nga negosyante ang mahimo magbuhin sang trabahante nga magatuga sang massive unemployment kag job displacement.
Pahanumdom sini nga kapin 60 porsyento sang mga negosyo sa Western Visayas ang makabig small and medium enterprises.
Panugyan sini nga kun magpatuman sang saka sa sweldo ini ang pahat-pahat lamang ukon staggard basis.
Dugang pa sini nga antes makapatuman sang pagpasaka sa sweldo, kinahanglan pa nga hulaton ang 1-year period gikan sa nakaligad nga wage increase.
Panawagan sini nga mas maayo kun magpatawag sang national summit kun sa diin yara ang representative sang labor sector, management sector kag gobyerno agud mabalanse ang nagakadapat nga pagsaka sang sweldo.
