Aminado ang labor advocate nga wala na sang lauman pa sa patigayunon nga State of the Nation Address (SONA) ni President Ferdinand “Bongbong” Marcos Jr subong nga adlaw.
Sa interview sang Bombo Radyo Bacolod kay Wennie Sancho, secretary-general sa General Alliance of Workers Association (GAWA), bilang labor advocate wala na sila sang ginalauman pa bangud ang SONA sang presidente ang nabalay na ukon scripted na.
Suno kay Sancho, bisan ang pagpamalakpak ang scripted man.
Suno kay Sancho, sa pihak sini, ginapangayo lamang niya mahatagan man sang pagtamod ni President Ferdinand “Bongbong” Marcos Jr. sa iya State of the Nation Address (SONA) ang paghatag sang ‘wage increase’ sa iban nga rehiyon kalakip na sa Western Visayas.
Suno diri, magluwas sa wage increase, mas kinahanglan sang mga mamumugon sang economic package ilabi na nga padayun ang pagnubo sang purchasing power sang mga empleyado.
Ini resulta man sa nagalala nga inflation, kag pagtimbook sang mga presyo sang balaklon matapos nga nagsaka ang presyo sang gatong tuga sang nagapadayun nga tensyon sa middle east.
