Indi pabor ang labor group sa plano nga importasyon sang 240,000 metric tons sang refined sugar.
Ini kasunod sang anunsyo sang Sugar Regulatory Administration (SRA) nga sila ang natalana nga mag-import sang 240,000 metric tons sang refined sugar subong nga tuig
Sa interview sang Bombo Radyo Bacolod kay Wennie Sancho, secretary general sang General Alliance of Workers Association (GAWA), madugay na nga problema ang Sugar Import Liberalization, apang wala gihapon ginahatagan sang solusyon.
Panindugan sini nga bilang labor group, sila ang batok gid sa lihok bangod sa pagsugot sang dako nga importasyon sang kalamay, madamo naman ang maapektuhan nga mga local sugar planters kag workers.
Suno diri, kun magbaha ang imported sugar, mapugday ang lokal nga industriya sang kalamay.
Sa kabug-usan ginabanta nga yara sa 700,000 ang mga sugar planters kag workers sa Pilipinas nga maga-antos kun mamiyerdihan ang local sugar production.
Ini ang may dako nga epekto sa Negros Occidental nga amo ang sugar bowl of the Philippines kun sa diin ang sobra sobra nga sugar importation ang ginalantaw nga makatuga sang economic displacement.
