Ginpahayag sang labor advocate nga ang pagtimbook sang utang sang Pilipinas sa P17.27 trillion ang nagapakita lamang sang palpak nga fiscal management sang gobyerno.
Sa interview sang Bombo Radyo Bacolod kay General Alliance of Workers Association Secretary General Wennie Sancho, kaangay nga nalubog na sa kumunoy ang Pilipinas kag indi na makatakas pa gikan sa kautangan.
Aminado ini nga ang nasambitan nga utang ang accumulated na nga utang gikan sa mga nakaligad nga administrasyon.
Sa projection, ginalantaw nga sa pagtakop sang Marcos Administration sa 2028, ang utang ang magadangat na sa P20 trillion.
Suno diri, dapat lantawon kun sa diin gingamit ang mga gin-utang sang gobyerno.
Ginalantaw sini nga dako nga bahin sang utang ang gingamit para sa mga infrastructure projects kag social services.
Pahayag ni Sancho, nga mahimo sa utang nagikan ang budget sang madamo nga mga flood control projects nga indi man epektibo.
Luyag sang labor group nga makita ang accountability sa nasambitan nga palpak nga mga proyekto.
Suno diri, ang nagapalumos sa Pilipinas sa utang, amo ang indi husto nga paggamit sang budget, kun sa diin madamo ang nagapangurakot.
Nagapati ini nga tubtob indi madula ang graft and corruption sa gobyerno, indi man makabangon ang Pilipinas.
Dugang pa sini nga ang gobyerno ang naga-utang agud ibayad sa utang, nga nagapadako lamang sa foreign debt.
Suno diri, may mode of payment ang Pilipinas, apang indi makabayad bangod sa tuman ka lala nga kurapsyon.
Bangod sini, ang kada Pilipino sa karun ang may-utang na nga P153,000, luwas pa sa personal nga mga kautangan kag bisan ang mga wala pa mabata, ang may-ara na sang utang.
Ginakahangawa sini ang pagpasa sang palas-anon sa mga pumuluyo paagi sa pagpasaka sang taxes.
Suno kay Sancho, sa magamay nga sweldo, kun magdako pa ang taxes, mas maganubo nagid ang purchasing power sang mga pumuluyo.
Kun may-ara naman sang wage increase, mahimo nga pasakaan naman ang presyo sang goods and services.
