Nanindugan ang secretary general sang labor group nga Sentro ng mga Nagkakaisa at Agresibong Manggagawa (SENTRO) nga ichallenge sang mga ini ang kabug-usan nga 2025 National Budget, nga para sa ila pinaka-corrupt sa tanan nga budget nga na-aprubahan sa Pilipinas.
Sa interview sang Bombo Radyo Bacolod kay Joshua Mata, problema sang pungsod ang mga kontrobersiya sa Ayuda sa Kapos ang Kita Program (AKAP) sang Department of Social Welfare and Development (DSWD), apang ang mas dako nga problema amo ang kabug-usan nga National Budget.
Partikular na ang mga proyekto nga wala nasulod sa inisyal nga proposal apang ginpalusot sang yara na sa bicameral committee.
Suno kay Mata, dako nga bahin sang 2025 budget ang para sa pork barrel, rasun nga wala ginhatagan prayoridad ang social services kaangay sang education kag health.
Suno diri, ginzero sang administrasyon ang paghatag sang budget sa Philippine Health Insurance Corporation, apang kaangay nga ginapadayaw ang pagpasaka sang 50 porsyento sa pila ka mga benefit packages.
Antes maaprubahan, suno diri dapat matun-an sang maayo sang PhilHealth ang paghatag sang budget sa programa, apang kaangay nga nagbulagbulagan lamang ang mga opisyales bangod ginmando ni President Ferdinand “Bongbong” Marcos Jr.
Dugang pa ni Mata nga ang tikang ang ginhimo lamang sang administrasyon agud makapulan ang kontrobersiya sa paghatag sang zero-budget, apang ang kabaylo sini amo ang pagkalupog sang PhilHealth.
Nagapati ini nga prelude ukon paumpisa lamang ang pagkaputo sang PhilHealth sa plano nga maprivatize ang health services sa Pilipinas.
Kun uyatan na sang Health Maintenance Organization ang health services, ginalantaw ni Mata nga kapitalista lamang ang makabenepisyo.
Samtang wala man ginhatagan prayoridad ang education sector, apisar nga nakapagkit sa konstitusyon nga ini ang dapat may pinakamataas nga alokasyon.
Kaupod sa iban nga grupo, pasalig ni Mata nga ila-ichallenge ang constitutionality sang 2025 National Budget.
