Nagpanugyan ang secretary general sang General Alliance of Workers Association (GAWA) nga dapat ireevaluate ang mga kurso nga gina-offer sang mga unibersidad ukon institution nga mangin kaangay ini sa trabaho nga ginapangita sang pungsod.
Sa interview sang Bombo Radyo kay Wennie Sancho, wala nagasanto ang mga kurso nga ginaoffer sang mga buluthuan sa job market.
Nagapanawagan ini sa Department of Education kag gobyerno nga hatagan sang pagtamod kun ano nga kurso ang mas kinahanglanon sang job market ilabi na sa karun nga madako ang numero sang unemployed kag underemployed.
Ginalauman ni Sancho, nga kun tani sundon kun ano nagakaangay nga trabaho ang mas nagasanyog sa karun nga tion para amo man ang mahatag nga kurso sa mga estudyante.
Suno diri, isa sa rason kun ngaa may yara sang mismatched sa trabaho amo nga madamo sang ginikanan ang mismo nga nagapili sang kurso para sa ila nga kabataan, nga kun kaisa ini ang rason kun ngaa mabudlay para sa estudyante ang pag-eskwela.
Ginalantaw man sini nga mas maayo kun iabanse ang Technical Vocational program kag Technical Educational and Skills Development Authority (TESDA) nga may yara sang kurso nga nagaka angay sa ginapangita sa job market.
