Ginapanawagan sang labor group sa administrasyon nga icertify nga urgent ang pagpasar sa proposed P100 legislated wage increase.
Sa interview sang Bombo Radyo Bacolod kay Josua Mata, secretary general sang Sentro ng mga Nagkakaisa at Progresibong Manggagawa (SENTRO), sa baylo nga buhinan ang holiday kaangay sa ginaduso ni Senate President Francis ‘Chiz’ Escudero, dapat nga pataasan ang sweldo agud mas magtaas man ang kalidad sa trabaho sang mga mamumugon kag mapasanyog ang productivity kag competitiveness sang Pilipinas.
Aminado si Mata nga ang ginaduso nga P100 legislated wage increase ang padayun nga stranded sa House of Representative, bangod wala ginatandog sang mga mamalidha.
Panawagan sini sa administrasyon nga bangod wala napatuman ang promisa nga P25 nga kada kilo sang bugas, mas maayo nga ipasar na lamang ang ginaduso nga P100 legislated wage increase agud may inugbakal sang bugas ang mga pumuluyo.
Suno diri, dako nga bulig para sa mga mamumugon ang makadali nga pahuway ukon double pay bangod sa Holiday, nga wala nagakabatyagan sang mga Senador bangod sila ang may malawig nga break kag padayun pa nga ginaswelduhan sang pumuluyo bisan sa ila nga pagpahuway.
Sa pihak nga bahin, masami nga nagapatuman sang long weekend ang administrasyon sa tinutuyo nga mapasanyog ang sirkulasyon sang kwarta, apang panindugan ni Mata nga ini ang matabo lamang kun may nagakaigo nga sweldo ang mga empleyado.
