Aminado ang labor group sa Negros Occidental nga wala sang dignidad ang mga Pilipino sa P200 nga monthly financial assistance sang gobyerno kadungan sang pagsaka sang presyo sang produktong petrolyo.
Sa interview sang Bombo Radyo kay Wennie Sancho, secretary-general sang General Alliance of Workers Association, indi manugpakilimos ang mga Pilipino nga wala sang choice kun gamay man ukon dako ang ayuda nga ihatag sang gobyerno.
Suno kay Sancho, wala sang dignidad ang tawo sa P200 kada bulan bangud kun tungaon ini sa 30 ka adlaw, masobra lang P6 ang iguan sini kada adlaw.
Kun lima naman ang miyembro sang pamilya nga benepisyaryo, masobra lang piso ang mabaton sang kada isa kada adlaw gani indi ini mapuslan bangud indi gani makabakal sang dulce ang piso.
Suno kay Sancho, kun isuspend ang excise tax sa petrolyo, tanan nga pumuluyo ang makabenepisyo bangud dako ang inubo sang presyo kada litro, apang nagapanukod ang economic managers sang Malacanang.
Kun may savings ang konsumidor sa ila gasto sa pagkaon suno kay Sancho, gastuhon man ini gihapon sa iban nga kinahanglanon.
Mas maayo man suno kay Sancho kun ihatag nalang sa mga oil companies ang subsidy agud wala sila sang rason nga indi magrollback kag indi mabudlay ang distribution.
