Ginaduso sang grupo sang mga mamumugon ang pagpasaka sang sweldo sang mga empleyado kasunod man sang pagmahal sang mga primary commodities matapos ang pagsaka man sang presyo sang gatong.
Sa interview sang Bombo Radyo Bacolod kay Wennie Sancho, secretary general sang General Alliance of Workers Associations (GAWA), kinahanglan na gid nga mapasakaan ang sweldo sang mga mamumugon bangud sa indi maayo nga sitwasyon sa karun kaangay sang tuman nga pagsaka sang gatong kasubong man sang balaklon.
Suno kay Sancho, may yara sila nga ipadala nga petition sa Marso 21 sa Regional Wage Board agud ipakita ang ginahingyo nila nga P300 tubtob P400 nga pagsaka sang ila nga sweldo.
Suno diri, kun mangin madinalag-on ang ila nga petisyon, mapatuman ang pagpasaka sang sweldo matapos sang 45 ka adlaw.
Ginpahayag man ni Sancho nga kun nagasaka ang mga balaklon dapat magsaka man ang sweldo sang mga empleyado.
Suno diri nagakadapat man nga I-restore ang purchasing power sang mga mamumugon kag ginapanawagan man sang grupo sang mga mamumugon sa Western Visayas ang immediate economic relief nga P100 nga makabulig man sa mga empleyado.
