Nagalaom ang grupo sang mga mamumugon nga madesisyunan na ang petition sa wage increase sa Western Visayas.
Sa interview sang Bombo Radyo Bacolod kay Wennie Sancho, secretary general sang General Alliance of Workers Association (GAWA), dismayado ang mga ini nga bangud makapila na ka beses nga gin-isol ang pagpatigayon sang deliberasyon sang wage increase sa Western Visayas.
Suno kay Sancho daw kaangay lamang nga gina-into sang gobyerno ang mga mamumugon.
Suno diri santo sa pagsulundan sang minimum wage fixing nga kun indi available ang mga representative dapat may yara ini sang ipadala nga tiglawas.
Suno diri ang halos tanan nga balaklon halin sa ahos, bombay padulong sa kalamay ang nagsalalaka na,a ang sweldo nalang sang mga mamumugon ang wala nagsaka.
Ginpahayag man sini nga sa subong lang nga administrasyon natabo nga wala nagakadayon sa natalana nga adlaw ang deliberasyon sang minimum wage increase kag daw kaangay nga ginapalagyuhan sang mga ini ang deliberasyon.
Suno kay Sancho dapat nga tampad nga mag-atubangay ang representative sang gobyerno, employer kag labor sector agud nga mahisayran na ang petition sa regional wage increase.
Nagapanawagan man ini sa mga employers nga bag-uhon man sang mga ini ang tagipusuon nila sa mga mamumugon kag indi sila pagkabigon nga daw kaangay sang production cost.
Suno kay Sancho, ang wage increase ang may yara sang 45 ka adlaw agud madesisyunan sang regional wage board.
Ang regional wage board ang ginabug-asan sang DOLE Regional Director bilang ex-officio Chairman; Regional Directors sang NEDA kag Department of Trade and Industry bilang ex-officio Vice-Chairman; kag duha ka representatives nga nagikan sa labor kag employer sector.
Nagalaom man si Sancho nga madayon ang deliberasyon sang petition sang regional wage increase sa regional wage board kag mahimo sang rasonable nga desisyon angot sa nagakaigo kag nagakadapat nga pagpasaka sang sweldo.
