Saka sa sweldo sang mga mamumugon ang ginapanawagan sang mga labor groups nga nagpatigayon sang pagmartsa kadungan sang pagdumdom sang Labor Day subong nga adlaw sang Lunes, Mayo 1.
Sa interview sang Bombo Radyo Bacolod kay Noli Rosales, Secretary General Kilosang Mayo Uno, ginapanawagan nila sa karun ang saka sa sweldo bangud ang sa karun nga minimum wage ang kulang na bangud sa tuman ka mahal nga mga balaklon.
Suno kay Rosales,dugang nga P300 sa P450 nga minimum wage ukon P750 minimum wage across the board ukon nationwide ang ila nga ginapanawagan.
Suno kay Rosales, nagpanawagan man ini nga respetuhon man ang kinamatarong sang mga mamumugon para sa free association kag indi sila pag ired-tag ilabi na kun manawagan para sa kaayuhan sang mga mamumugon.
Suno diri, dapat lantawon man sang presidente kag himuan sang tikang nga masolusyunan ang ginapangatubang nga mga problema sang mga mamumugon.
Samtang, una naman nga ginpanawagan sang Secretary General sang General Alliance of Workers Association (GAWA) nga maghugpong ang tanan nga mga mamumugon agud nga ipanawagan nga mahatagan sang pagtamod ang mga ila ginapangatubang nga problema.
Samtang suno naman kay Leni Espina., anay empleyado sang Bacolod Water District ukon BACIWA, nagapawagan sila nga ibalik na sila sa ila nga trabaho kasunod sang desisyon sang Civil Service Commission sa Western Visayas nga ire-install na sila.
Suno kay Espina, dapat nga mabalik na sila sa ila nga trabaho nga ginkuha sa ila agud nga makabulig man sila sa pagkay-o sang serbisyon sang prime water nga magluwas sa tuman ka mahal nga sukot, lubog pa nga tubig ang ginahatag sa mga pumuluyo.
Nagapanawagan man ini sa head office sang Civil Service Commission nga ipagwa na ang ila nga decision sang mas temprano agud nga makabalik na sila sa pagtrabaho bangud ang ila nga pamilya ang apektado nagid sa ginhimo sang nasambit nga water district.
