BACOLOD CITY – Magapatigayon sang hublag-protesta ang sektor tagpangabudlay sa maabot nga Mayo Uno, Labor day.
Suno kay Save the Sugar Industry Movement (Save-SIM) Convenor Wennie Sancho, madamo sila sang labor issues nga igasinggitan sa adlaw nga gindedikar para sa mga empleyado kag mamumugon apang labaw sa mga ini ang problema nga ginaatubang sang mga trabahador sa kampo sang tubo.
Suno kay Sancho, ang issue sa high fructose corn syrup (HFCS) ang ila ginatutukan bangud nakataya diri ang kabuhi sang industriya sang kalamay kun sa diin nagasandig ang palangabuhian sang 300 mil ka mga farm workers kag 14 mil ka mga mill workers.
Ginpabutyag sang labor leader nga wala sila nagapati sa ginpahayag sang softdrinks company nga Coca-Cola nga 100 porciento nga lokal nga kalamay na ang ila ginagamit nga inugpatam-is sa ila produkto.
Ini bangud padayon man ini sa pagpangayo sang anom ka bulan nga moratorium agud ila makondisyon ang ila mga makina sa paggamit sang kalamay bangud gindesinyo ini sa paggamit sang HFCS.
Suno kay Sancho, ang ila protesta ang pagpakita sang padayon nila nga pag-boycott sa Coca-Cola products kag subong man agud ipanawagan ang paghatag sang regular nga trabaho sa mga mamumugon sa kampo.
