Nagpaandam ang General Alliance of Workers Association nga mahimo mag-ibwal ang labor sector kun dayunon ang plano nga pagbuhin sang holidays sa Pilipinas, nga nagakahulugan pagbuhin sang benefits para sa mga mamumugon.
Sa interview sang Bombo Radyo Bacolod kay GAWA Secretary General Wennie Sancho, ang Lower kag Upper Congress man ang nagpadamo sang mga holiday.
Aminado ini nga ang double pay sa tion sang holidays ang makabenepisyo sa mga mamumugon apang may-ara man sang employer nga nagapatuman sang No Work No Pay agud malikawan ang pagbayad.
Pahayag ni Sancho nga imbes buhinan ang holiday, mas nagakadapat nga dulaon na ang No Work No Pay, agud ma-enjoy sang tanan nga mamumugon ang kaangay nga benepisyo.
May-ara man sang fly by night, ukon mga mamumugon nga ginatago lamang agud indi na kinahanglan maghatag sang benepisyo santo sa nakapagkit sa layi.
Pahanumdom sini nga ang mga holidays ang ginadeklarar bangod ang mga ini ang signipikante sa maragtas sang pungsod gani madamo sang konsikwensya kun ini ang bawion.
Indi man mahimo nga sundon sang Pilipinas ang pagpatuman sa Estados Unidos bangod sila ang may comprehensive coverage kag may mataas ang pagkilala sa labor sector.
Panindugan ni Sancho nga madamo pa sang problema ang pungsod, kag ang pagbuhin sang holidays ang indi man vital para sa kaayuhan sang pungsod.
Pahanumdom sini nga nakapagkit sa layi nga indi pwede nga buhinan ang benepisyo nga gina-enjoy sang mga empleyado, kag ini ang sarang ma-envoke sang labor sektor agud pamatukan ang tikang.
Ini bangod sa pagbuhin sang holidays, mabuhin man ang double pay sang mga trabahante.
Dugang pa sini nga nagakapagkit man sa konstitusyon nga dapat protektahan sang gobyerno ang labor sektor, kag ang pagbuhin sang benefits ang maathag nga pagbayolar sini.
