Madamo pa sang mga aktibidad nga ginpatigayon sa pagsaulog sang Masskara Festival 2023 sa ika-12 nga adlaw sang selebrasyon.
Kadungan sa nagahilapit nga pagtakop sang kapiestahan sa Domingo, mas nagadamo pa ang mga aktibidad nga ginapatigayon, kadungan man sang pagdamo sang tawo.
Kaangay lamang sang mga aktibidad nga madinalag-on nga napatigayon kahapon.
Kalakip diri ang 7th Sabor Bisaya at the Masskanamit Culinary Showdown, kun sa diin nagpaindis-indis sang nanarisari nga luto gamit ang bisaya nga manok nga ginpatigayon sa Upper East Megaworld.
Kahapon, gindugukan man sang madamo nga mga Bacolodnon kag bisita ang paghampang sang Philippine Basketball Association (PBA) teams nga Meralco bolts kag Rain or Shine Elasto Painters sa University of St. La Salle (USLS) coliseum.
Subong nga adlaw, magabukas naman ang ulihi nga festival site sa subong nga tuig nga Masskara Festival, ang Lacson strip.
Makita diri ang display of colors, kun sa diin may-ara sang masobra 60 nga mga corporate booths, masobra 100 nga food kiosks kag anom ka mga major stages.
Balantayan ang dalagko nga mga celebrities nga magaperform sa nasambit nga stages kalakip na sanday Sarah Geronimo kag KZ Tandingan.
Samtang balantayan man ang Handog ng Bombo Radyo kag Star FM sa MassKara Festival – Dance Showdown Competition sa Oktobre 20 sa Bacolod City Public Plaza.
Diri masaksihan ang world class performance sang 10 ka mga competing dance crew, samtang magahatag man sa atun sang kalingawan ang casts sang bantog nga Toyang Ermitanya nga makapahalakhak sa inyo.
Sa Oktobre 21, patigayunon naman ang Electric Masskara sa Upper East Megaworld kag sa Oktobre 22, amo ang highlight kun sa diin patigayunon naman ang Street Dance and Arena Competition.
Ang aktibidad ang magasugod ala-1:00 sang hapon, apang wala na sang patigayunon nga pagsaot sa dalan, kundi mangin parade na lamang samtang ang 10 ka participating barangay ang magapaindis-indis na lamang sa Paglaum Sports Complex.
