Nagpanawagan ang gobernador sang Negros Occidental sa provincial director sang Negros Occidental Police Provincial Office (NOCPPO) nga usisaon kag padalman ang natabo nga ambush sa apat ka mga persona sa Barangay Palampas sa syudad sang San Carlos.
Suno kay Negros Occidental Governor Eugenio Jose “Bong” Lacso, nagpanawagan na ini kay P/Col Leo Pamitan nga imbestigaran sang maayo ang natabo nga ambush ilabi na nga nakabatun ini sang impormasyon nga mahimo indi sakay sa Mazda3 nga gintadtad sang bala sang mga suspetsado ang ila nga target.
Madumduman nga tatlo ang patay samtang isa naman ang yara sa kritikal nga kondisyon bangod sa ambush.
Ang mga biktima ang ginkilala kanday Andre Fajardo, 18-anyos, residente sang Ylagan, extension, Barangay 6; Russel Bucao, 40-anyos, kasado, residente sang Urban Phase 1, Brgy. Rizal; Rudy Dela Fuente, 51-anyos; kag Renante Chiu, 27-anyos, lunsay residente sang San Juan Baybay, San Carlos City.
Sanday Fajardo kag Bucao ang dead on the spot samtang dead on arrival naman si Dela Fuente kag si Chiu ang nagapabilin nga nakaconfine sa San Carlos City Hospital kag kritikal ang kondisyon bangod sa madamo nga igo sang bala.
Ang mga biktima ang magapadulong kuntani sa isa ka bulang sa nasambit nga barangay kun sa diin may dala pa ang mga ini nga duha ka inog-bulang nga manok.
Nagdangat sa 58 ka empty shell sang caliber 5.56 mm rifle kag isa ka fired slug sang caliber 45 pistol ang narecover sa crime scene.
Apisar nga ginpahayag na sang NOCPPO nga isolated case, ginapatutukan gid sang gobernador ang kaso ilabi na nga lunsay mga sibilyan ang mga biktima.
Dugang pa ni Lacson nga nakabatun siya sang impormasyon nga mahimo wala sa mga biktima ang target sang mga armado nga persona ilabi na nga ginhulam lang sang mga ini ang salakyan.
Ang Mazda3 ang nahibaluan nga ginapanag-iyahan sang ginkilala kay alyas Iraq.
Gani ginalantaw ang posibilidad sang mistaken identity sa natabo nga pagpamatay.
Nagpanawagan man si Lacson sa mga mahimo nakawitness ukon may ihibalo sa kun sin-o ang nag-ambush nga makig-angot sa mga kapulisan partikular na sa San Carlos City Police Station.
Ginapanugyan man sang gobernador nga mahimo man nga magbulig sa kaso ang National Bureau of Investiogation (NBI) kag sa Local Government Unit sang Barangay Palampas.
