Nagluntad ang lahar flow sa pila ka mga lugar sa banwa sang La Castellana kasunod sang pagbubo sang mabaskog nga ulan kahapon, Hunyo 6, 2025.
Sa ginpagwa nga Kanlaon Volcano lahar advisory sang PHIVOLCS, nakita ang lahar flow sa Buhangin River; Taytay nga malapit sa Hacienda 92 sa Brgy. Sag-ang kag sa Ibid Creek sa Brgy. Biak-na-bato sa banwa sang La Castellana.
Suno sa advisory nga base sa PAGASA Regional Weather Advisory, nangin apektado ang Negros Island Region sang Low Pressure Area (LPA) kag sang Southwest Monsoon.
Sa Heavy Rainfall Warning sang PAGASA, may kabug-usan nga 45.5 mm sang ulan nga naglawig sang tatlo tubtob lima ka oras ang narekord man sang All-weather Station sang Kanlaon Volcano Observatory sa La Carlota City, samtang ang mas mataas nga kadamuon sang ulan mahimo nga natabo sa palibot sang summit area sang bulkan.
Nagpanugyan ang PHIVOLCS sa publiko kag sa local government units nga padayon nga mangin vigilante kag mag-monitor sa lakat sang panahon kag maghimo sang nagakaigo nga pre-emptive response measures.
