Ginpagwa sang PHIVOLCS ang mapa nga nagapakita sang mga lugar nga posible maapektuhan sang pag-ilig sang lahar gikan sa 3 million metric tons sang ash deposits gikan sa paglupok sang bulkan sa Mt. Kanlaon tinalikdan nga Disyembre 9, 2024.
Suno sa PHIVOLCS “three times greater” ini nga mas madamo kun ipanggid sa 1 million metric tons sang ash deposits nga narekord sa tion sang nagligad nga paglupok sadtong Hunyo 3, 2024.
Sa posible nga Low Pressure Area (LPA), ginalauman ini nga magadala sang ulan sa masunod nga semana samtang ang risgo sang ashfall nga mangin lahar flow nagataas.
Hugot nga nagapanugyan karon ang PHIVOLCS sa publiko ilabi na ang apektado sang paglupok sang bulkan ang magpabilin nga alerto, magsunod sa mga protocol nga ginapatuman, kag magbantay sang mga update gikan sa otoridad.
