Liwat nga gindominar sang Los Angeles Lakers ang Game 2 batok sa Miami Heat agud uyatan ang 2-0 nga lead sa nagapadayon nga NBA finals.
Nagtingob liwat sang pwersa sanday LeBron James kag Anthony Davis agud makuha ang ikaduha nga kadalag-an sa score nga 124-114.
Kaangay sa Game 1, wala sa gihapon napunggan sang Miami ang power duo.
Apisar ginbaylo sa mga injured nga sanday Goran Dragic kag Bam Adebayo sa starting line up sanday Tyler Herro kag Meyers Leonard, wala sa gihapon sang may nahimo ang mga ini.
Sa interview sang Bombo Radyo Bacolod kay Basketball Coach Leo Ceralbo, ginpahayag sini nga kontrolado gid sang Lakers ang hampang.
Suno sa iya, dapat nga maghimo sang major adjustment sa defense sini ang Miami agud nga magpangibabaw sila sa Game 3.
Nagakadapat man suno kay Ceralbo nga i-trimdown bisan tag-napulo ka puntos lang sanday James kag Davis agud makalagas ang Heat.
Dugang pa sang basketball coach nga mabaskog gid katama ang rebounding situation sang Lakers.
Maayo nalang suno diri nga daw tabingi ang mga 3-point shots sang Lakers bangud sa madamo nga 3-point attempts sang mga ini, pipila lang ang nagakasulod.
Kun wala napunggan ang mga 3-point shots sang Lakers, mas dako pa gid ang abanse sang mga ini suno kay Ceralbo.
