Ano bala ang sarang mo nga himuon agud makapalagyo sa penalidad nga ginapangatubang sa mga otoridad?
Gin-aresto ang isa ka lalaki matapos ginpeke ang kamatayon sini kag nagpatigayon sang lubong para sa kaugalingon agud makalikaw sang salabton sa kaso sini sa pagmaneho nga yara sa impluwensya sang makahulubog nga ilimnon, kag wala sang nagakaigo nga dokumento kaangay sang lisensya.
Suno sa mga kapulisan, ikatatlo na nga naaresto ang lalaki nga ginkilala kay alyas “Si” sang Hunan, China sa pareho nga kaso.
Ganinagapangatubang na ini sang mabug-at nga penalidad bangud sa paglapas sang makatatlo na ka beses.
Samtang temporaryo nga hilway si Si bangud nakapiyansa, nagplano ini nga i-peke ang kaugalingon nga kamatayon agud indi na siya pagpangitaon sang mga otoridad.
Ginkumbinse niya ang iya pamilya nga magbulig sa paghimo sang plano.
Sang Hunyo sang nakaligad nga tuig, nagbakal si Si sang lungon kag ginplastar ang funeral service sa ila balay kag ginpaggwa nga napatay ini sa overdose.
Apang nanotisyaran sang mga kapulisan ang mga makaduluda nga mga detalye kaangay sang pagbakal sang lungon antes pa man ang kamatayon ni Si kag wala nagtawag sang ambulansya ukon sa kapulisan natuhoy sa insidente.
Natukiban man nga wala sang na-isyu nga death certificate ukon record sang cremation para kay Si.
Paagi sa surveillance footage kag bank records, nakumpirmar sang mga kapulisan nga buhi pa ini.
Sa ulihi, naaresto si Si sang Abril sini nga tuig kag nagapangatubang sang patong-patong nga mga kaso kag multa nga kapin 20,000 yuan ukon P185,000.
