Nakuhaan sang halos P1.5 million nga balor sang suspected shabu kag granada ang lalaki nga nadakpan sa checkpoint sa San Juan Street, Barangay 6, Bacolod City alas-11:10 kagab-i, kadungan sa opening sang Masskara Festival 2025.
Ang suspect ang ginkilala nga si Anthony Cuadra, 35 anyos, single, residente sang Purok Sigay, Barangay 2, Bacolod City.
Nahibaluan nga samtang nagapatigayon sang checkpoinr ang Bacolod Police Station 2, nakita nila ang itom nga motorsiklo nga wala sang side mirror kag wala man sang helmet ang driver.
Ini ang nagtuyo pa nga maglikaw sa checkpoint apang na-aprehend sang blocking team sang Bacolod Police Station 2 kag Bacolod City Mobile Force Company.
Narecover gikan kay Cuadra ang lima ka sachet kag isa ka knot transparent plastic bag sang suspected shabu nga ginabanta nagabug-at sang 250 grams, nga may standard drug price nga P1,496,000.
Nakuha man sa iya ang P35,370 nga kwarta nga ginapatihan benta sa pagbaligya sang illegal nga droga.
Ginalantaw nga plano pa sini nga idispose ang nabilin nga suspected shabu karun nga ginaselebrar ang Masskara Festival.
Yara naman sa Barangay Anti-Drug Abuse Council (BADAC) list si Cuadra kag ini ang nakaagi naman priso.
Samtang, narecover naman ang isa ka granada sa compartment sang iya motorsiklo.
