Wala na sang kabuhi sang masapwan ang isa ka 51-anyos nga lalaki sa isa ka pil-as sa ciudad sang Talisay kahapon.
Sa interview sang Bombo Radyo kay Police Staff Sergeant Edmundo Jomocan, imbestigador sang Talisay City Police Station, masami nga makit-an nga hubog ang biktima nga si Jonathan Salvador, 51 anyos, bulag sa asawa, kag residente sang Sitio Tambara, Brgy. San Fernando, Talisay City.
Suno kay Jomocan, nag-inom ini sa kaadlawan sang iya nga abyan sang Hulyo 13 upod ang iya nga bata apang nagbulagay sila sang kaagahon.
Suno sa hepe, sang Hulyo 14, alas 6:00 sang aga pa lang sang nag-inom naman ini sang beer sa isa ka tiyange tubtob alas 7:00 sang gab-i.
Kahapon, Hulyo 15 sang ginpangita na si Salvador sang iya mga himata bangud wala na ini nakapauli.
Suno sa imbestigador, nakit-an ini sang iya nga hinablos nga yara sa pil-as nga may kadalumon nga 50 feet.
Nakaangkon si Salvador sang pilas sa ulo kag bagras sa nagkalain-lain nga parte sang lawas.
