Nasapwan nga patay ang isa ka lalaki sa sulod sang Toyota Vios nga pula sa Purok Tumpok, Barangay Zone 15 sa ciudad sang Talisay, Martes sang hapon.
Sa interview sang Bombo Radyo Bacolod kay Police Staff Sgt. Edmundo Jomocan Jr., imbestigador sang Talisay City Police Station, mga alas-3:49 sang hapon sang nakabaton sila sang tawag nga may yara sang nasapwan nga patay sa nasambit nga lugar.
Suno diri, wala pa sang identity ang biktima nga ginabulubanta may kataason nga 5’7”, nakasuksok sang puti nga jersey nga may yara sang numero 11 kag naka-imprinta nga Irving sa likod kag nakasuksok sang stripe nga shorts nga pula.
► Talisay killing posible nga may kaangtanan sa illegal drugs – PNP
May yara man ini sang tattoo nga rosas sa iya nga natuo nga abaga, tattoo pa gid sa iya nga dughan kag nawala nga abaga kag tattoo sa likod nga may nakasulat nga HGL 200.
Suno kay Jomocan, base sa iya nga ihibalo, nagakahulugan ang HGL 200 sang Happy Go Lucky 200 kag nakaagi priso sa Muntinlupa ang may kaangay sini nga tattoo.
Nagagwa naman sa inisyal nga imbestigasyon nga nakaangkon ang biktima sang apat ka igo sa iya nga likod kag tag-isa ka igo sa natuo kag nawala sini nga abaga.
Narekober naman sa crime scene ang duha ka mga empty shells sang ginapatihan M16 rifle, isa ka deformed slug bullet kag mga metallic fragment.
Sa karon, padayon pa ang imbestigasyon sang kapulisan sa insidente.
