Nasapwan ang bangkay sang isa ka lalaki sa sulod sang manhole sa Purok Makawiwili, Barangay Banago ciudad sang Bacolod kaina sang aga.
Ginkilala ang biktima nga si Dennis Yanguer, 36-anyos sang nasambit nga lugar.
Sa interview sang Bombo Radyo Bacolod sa iloy sini nga si Maria, duha na ka adlaw nga wala makapauli sa ila balay ang biktima.
Suno diri, naanad na man lang sila nga wala nagapauli kun kaisa si Dennis bangud masami man ini nagakadto sa ila himata sa Purok Arao, Barangay Estefania.
Nahibaluan nga si Yanguer ang nagapangkay-o sang appliances.
Luyag naman karon sang pamilya nga ipa-autopsy ang bangkay sini agud matul-id ang ginkamatay sang biktima.
Samtang, mismo si Punong Barangay Ricky Mijares ang nakakita sa bangkay matapos ini nakabaton sang impormasyon.
Suno diri, gilayon niya nga ginkadtuan ang lugar kag iya nakumpirmar nga may yara gid man sang bangkay sa sulod sang tamburong nga may kadalumon nga 16ft.
