Patay ang 23 anyos nga bag-o lamang nakagwa sa prisuhan bangud sa kaso nga pagpangawat matapos nga gintiro sa Hacienda De Fuego 1, Brgy. Bagtic, Silay City, Negros Occidental kahapon sang kaagahon.
Sa impormasyon nga natipon sang Bombo News Team, ang biktima ang ginkilala nga si John Loyd Layson, 23 anyos, single, wala sang trabaho kag residente sang nasambitan nga lugar.
Sa interview sang Bombo Radyo Bacolod kay Police Lt. Col. Mark Anthony Darroca, hepe sang Silay City Police Station, ginreport sang isa ka concerned citizen nagikan sa nasambit nga barangay ang insidente sang papangluthang sa Silay City Police Station pasado alas-2:00 sang kaagahon.
Suno kay Darroca, ginpadulungan nila ang lugar sang insidente kag ila nahibaluan nga ang biktima ang nagwa sa ila balay, nagbakal sa tiyangge kag nagpungko sa basketbolan kag may iban man nga tawo sa lugar.
Dugang pa sang hepe nga may yara lamang sang nagpalapit sa biktima kag ini ang gintiro.
Suno diri sang February 2024 napriso man ang biktima sa kaso nga theft.
Ginalantaw nga mahimo ginbalikan ang biktima, bangud nahibaluan nga may nagapangita sa biktima antes ang insidente.
Ang pilas sang biktima ang ginalantaw sa ulo apang wala pa sang kumpirmasyon bangud wala pa nagwa ang autopsy result sa bangkay samtang ginahibalo pa kun ano nga kalibre sang armas-luthang ang gingamit sa krimen.
Sa karun padayun pa ang imbestigasyon sang Silay City Police Station agud nga matumod ang suspek kag motibo sa pagpatay sa biktima.
