May person of interest na ang Bacolod Police Station 10 sa suspek nga nagluthang sa lalaki nga caretaker sang propedad sa Zone 1, Brgy Handumanan, Bacolod City, kaina sang udto.
Ang biktima ang ginkilala nga si alyas ‘Henry’ residente sang banwa sang Murcia kag nagatrabaho sa Negros Economic Development Foundation, Inc.
Sa interview sang Bombo Radyo Bacolod kay Police Capt. Sherwin Galupar, station commander sang Bacolod Police Station 10, nakita sa CCTV footage nga ginasundan sang suspek ang si Henry kag hinali lang sini nga ginluthang ang biktima.
Nag-agom sang isa ka igo sa ulo ang biktima nga gintunaan sang gilayon sini nga kamatayon.
Ginreport sa kapulisan ang natabo kag gintinguhaan nga lagson ang suspek apang wala na nahimo pa nga makit-an ini.
Suno sa kakilala sang biktima, siya ang gintawagan lamang kag ginpahibalo sa natabo.
Suno diri, maayo man magtrabaho ang biktima kag wala man ini sang problema sa ila opisina.
Ang biktima ang nagasakay sa Honda XRM nga nagaduag sang puti kag itom, nagasuksok sang green nga polo shirt kag dilargo nga gray.
Nakit-an man ang dugo sa bahin sang ulo sang biktima nga posible diri ini gintiro.
