Patay ang lalaki nga drayber sang tractora matapos nga mapintalan sang manibela sang madagdag sa pil-as ang tractora sa Hda Loygoy, Brgy Granada, Bacolod City, kaina sang aga.
Sa interview sang Bombo Radyo kay Herwin Martinez, nagasakay ini sa trailer sang tractora kaupod si Reynato Sause kag ang drayber naman amo si Mario Tandog, 59 anyos.
Nagatalikod ang tractora agud nga kargahan sang compost sang hinali lang ini nga nagderetso sa pil-as.
Suno kay Martinez, naka-break pa si Tandog apang natigayon ini nga madagdag sa masobra sa 10 feet .
Nakahingagaw nga maglumpat sanday Martinez kag si Sause nga nag-agom sang minor injuries apang napintalan si Tandog sang manibela sang nagkaya ang tractora samtang nag-agom sang pilas sa ulo kag dughan ang drayber nga si Mario Tandog rason sang kamatayon sini matapos nga madagdag sa pil-as ang tractora.
Suno kay Giovanni Tandog, utod sang biktima, ginbutong sang backhoe ang tractora apang nakakas lamang ang trailer kag nabilin sa pil-as ang ulo sang tractora kun sa diin sakay ang utod sini.
Nagpatawag na lamang sang special rescue team agud matigayon nga makuha ang bangkay sang biktima.
Suno diri, madugay na nga nagatrabaho ang iya utod bilang driver kag magaretiro na kuntani sa Pebrero.
Ang biktima ang may pulo ka mga kabataan kag ang asawa sini ang nagatrabaho bilang Barangay Health Worker.
Pahayag ni Giovanni, pahibaluon sini ang ila pamilya sa natabo apang aminado ini nga mabudlay para sa iya nga isugid sa ila iloy ang pagkapatay sang iya utod.
