Nakapauli na ang lalaki nga ginaalegar gin-abduct sa Palanca Road, Barangay 13, ciudad sang Bacolod kagab-i.
Una diri, nagpadulong sa Bacolod Police Station 1 ang misis ni Jomel Cardinal sang Barangay 35 agud ipa-blotter ang pag-abduct sang mga lalaki nga nagasakay sa van sa iya bana.
Suno kay Police Major Ramil Sarona, station commander sang Police Station 1, sanday Cardinal kag iya pakaisa ang nagpundo sa Barangay 13 agud nga magbakal sang gasolina para sa tricycle apang may tatlo ka salakyan nga nagpundo kag ginpasakay si Cardinal.
Sang nagpauli, nagpanugid ang pakaisa sa misis ni Cardinal nga gin-abduct ang iya mister gani siya ang nagpadulong sa Police Station 1.
Sang tungang gab-i, nagpanawag si Cardinal sa iya misis agud magpahibalo nga maayo ang iya kahimtangan kag magapauli ini.
Kaina sang aga, ginbalikan sang mga pulis ang misis kag iya ginkumpirmar nga nakapauli na ang iya bana apang wala nanugid kun ano oras.
Suno sa panugiron ni Cardinal sa misis, kilala niya ang yara sa salakyan kag may yara lang sila sang gin-istoryahan antes siya nagpauli.
Ginpadulungan man sang otoridad ang balay nanday Cardinal sa Barangay Banago kag ginkumpirmar sang amay nga nakapauli ang iya anak.
Suno kay Sarona, wala sang criminal record si Cardinal sa Police Station 1 apang ginatsekyar pa sa iban nga police station ang background sini.
