Patay ang 23 anyos nga gina-alegar imbulbado sa kinawatay matapos ginluthang sa Hacienda De Fuego 1, Brgy. Bagtic, Silay City, Negros Occidental alas-12:05 kaina sang kaagahon.
Sa impormasyon nga natipon sang Bombo News Team, ang biktima ang ginkilala nga si John Loyd Layson, 23 anyos, single, wala sang trabaho kag residente sang nasambitan nga lugar.
Nareport ang insidente sa kapulisan ginabanta alas-2:20 kaina sang kaagahon.
Sa inisyal nga imbestigasyon ang biktima ang nagapungko sa isa ka concrete bench malapit sa basketball court sang siya ang hinali na lamang ginluthang sa ulo sang wala pa makilala nga persona gamit ang wala pa matumod nga kalibre sang armas-luthang.
Gilayon man nga nagpalagyo gikan sa lugar ang suspect, nga nagalakat lamang.
Ang biktima ang gindala pa sa Teresita lopez Jalandoni Provincial Hospital apang gindeklarar na nga dead on arrival alas-2:55 sang kaagahon.
Sa karun nagapatigayon pa sang hot pursuit operation kag follow-up investigation ang Silay City Police Station.
Kalakip sa motibo nga ginatutukan ang daan nga hiligut-anon ukon ang kaangtanan sini sa mga insidente sang kinawatay.
