Nakuryente ang lalaki nga ginapatihan may problema sa paminsaron, matapos magsaka sa poste sa ciudad sang Talisay.
Ang nakuryente ang ginkilala nga si alias “Jimmy”, 53-anyos, kag residente sang Filipina Baybay, Barangay Zone 7.
Sa interview kay Police Lieutenant Felix Bergantinios III, Deputy Chief of Police sang Talisay City Police Station, nagsaka ang lalaki sa power pole sang Negros Power sa diin ini ang na-kuryente pasado alas-8:00 sang gab-i, Setyembre 20.
Gilayon nga gindala si Jimmy sa ospital sa ciudad sang Bacolod.
Suno kay Bergantinios, nakaagom ang biktima sang burn injuries sa nagkalain-lain nga bahin sang iya lawas partikular sa iya nawong kag batiis.
Ginpahayag nga posible may problema sa paminsaron ang biktima.
Sa karon, yara na ini sa estable nga kondisyon samtang padayon nga ginabulong.
