BACOLOD CITY – Padayon pa ang imbestigasyon sang mga kapulisan sa kamatayon sang isa ka lalaki nga nasapwan nga nakabaklid kag nagautaw-utaw sa baybayon sa Purok San Roque, Barangay Tangub, ciudad sang Bacolod kaina sang aga.
Sa pag-usisa sang Bacolod City Police Station 8, nakilala ini nga amo si Wilson Dolar alyas Toto Dungol kag tumandok sang Barangay Taloc, Bago City.
Nakabaklid ang kamot kag tiil sini gamit ang nylon cord kag may pilas sa dughan kag ulo tuga sang pagluthang.
Suno kay Police Senior Inspector Wilfredo Benoman, commander sang Bacolod City Police Station 8, nasapwan ang bangkay 60 metros nagikan sa shoreline apang gindala ini sang mga residente sa higad sang baybay.
Sikyaron pa sang kapulisan kun ano ang police record sini kag ipaidalom man sa autopsy examination ang bangkay.
Suno kay Edwin Hondana, purok chairman sang Purok San Roque, Barangay Tangub, kilala gid man nga kawatan ang biktima sa ila lugar apang nagsaylo na ini sa Barangay Taloc sa ciudad sang Bago.
Nakit-an pa ini kahapon sang pila ka mga residente rason nga nagapati ang purok chairman nga kagab-i ini ginpatay.
Sa impormasyon nga nakuha sang Bombo Radyo, may yara sang warrant of arrest ang biktima sa kaso nga murder.
