Wala pa sang identity ang bangkay nga ginaalegar ginsalvage kag nasapwan sa Hacienda Nalipay, Brgy. 5, banwa sang Isabela kahapon sang aga.
Sa interview sang Bombo Radyo kay Police Captain Joseph Partidas, hepe sang Isabela Municipal Police Station, alas 6:30 sang aga sang nakit-an sang isa ka bakero ang bangkay sa kampo sang tubo sa nasambit nga lugar kun sa diin nagakaya ini, nahigtan sang duck tape ang itsura kag kamot, may lima ka buno sa lawas, may alambre nga nagakuga sa liog sini kag wawa ang puwak.
Suno kay Partidas, gilayon nga ginreport sang bakero ang iya nakit-an sa barangay kag ginpahibalo naman sang barangay ang mga kapulisan.
Gilayon sila nga nagresponde kag didto nasapwan ang biktima nga wala sang bayo kag nakashorts lang nga maong.
Suno sa hepe, nakig-angot sila sa tanan nga barangay sa banwa kun may nagreport nga may nadula nga himata apang wala man suno sa mga opisyales.
Yara sa karun ang bangkay sa isa ka funeral parlor kag ginahulat nga may magclaim nga pamilya ukon magpablotter.
Suno kay Partidas, kun tan-awon ang basis sang pagpatay, posible nga dako ang kaakig sang mga suspetsado sa biktima.
Sa karun, nagapadayon pa ang imbestigasyon sang kapulisan.
