BACOLOD CITY – Nasapwan nga nagalutaw-lutaw sa baybayon nga nasakupan sang Barangay Singcang Airport, ciudad sang Bacolod ang patay nga lawas sang isa ka persona kaina sang aga.
Ang mananagat nga si Steward Manuel, nga nagalayag padulong sa banwa sang EB Magalona, ang nagpalab-ot sang impormasyon sa Bombo Radyo sa nakit-an sini nga lawas nga may malaba nga buhok, pution, nagakulob, wala sang bayo nga pang-ibabaw.
Suno kay Manuel, ang lawas ang nagalutaw kapin duha ka kilometros gikan sa panghigaron.
Samtang, positibo nga ginkilala sang amay sini ang bangkay nga amo si Jessie Catubigan Dalida, 37-anyos kag pumuluyo sang Purok 5, Sitio Magsungay, Barangay Singcang Airport.
Suno sa amay nga si Mario, nag-inom-inom ang biktima kag iya mga abyan sa ila balay las-11:30 kagab-i apang matapos nagbinulagay, ginpahayag nga nagpadulong siya sa abyan sini sa Purok 6, sa amo man nga barangay.
May pika-pika sa amo nga lugar kag didto ginapatihan naangkon sang biktima ang pilas sini sa agtang kag mga bagras sa kamot.
Kaina sang aga, tyempo nga nagapamakal sang seahorse sa amo nga lugar si Mario samtang ginaguyod pahigad ang bangkay.
Nagpanagupnop na ini nga anak niya ang biktima kag sang naglusong ini sa tubig agud magbulig sa pagpahigad sa bangkay, iya ini nakumpirmar.
