Masobra P200,000 nga balor sang illegal nga druga ang nakumpiskar sa isa ka lalaki matapos nga madakpan sa ginpatigayon nga buybust operation sang Bacolod City Drug Enforcement Unit sa Purok Paloma, Barangay 16, Bacolod City.
Ginkilala ang suspetsado kay Rustom Padilla, 30 anyos kag residente sang Purok Libertad Baybay, Barangay 16, Bacolod City.
Sa interview ang Bombo Radyo Bacolod kay Police Lt Col. Antonio Benitez Jr., pinuno sang Bacolod City Drug Enforcement Unit, si Padilla ang madugay na nga ginamonitor kag yara ini sa drug watchlist sang nasambit nga police unit kag sa Barangay.
Suno kay Benitez, nagapasalamat ang mga pumuluyo bangud natigayon na nga madakpan ang nagabaligya sang illegal nga druga sa ila nga komunidad.
Madugay man ang monitoring nga ginpatigayon sang mga kapulisan antes pa ginkasa ang buybust operation batok diri.
Nakuha sa paghinakop sini ang walo ka sachets sang suspected shabu nga gibanta nagabug-at sang 30 grams kag may balor nga P204,000.
Magapatubang naman si Padilla sang kaso nga paglapas sa RA 9165 ukon Comprehensive Dangerous Drugs Act of 2002.
