Nakilala na ang identity sang lalaki nga ginluthang-patay sa Purok Zone 1, Barangay Handumanan, Bacolod City kahapon sang hapon.
Sa inisyal nga impormasyon sang Bombo News Team ang biktima ang ginkilala nga si Arnold Cabales, 37 anyos, tumandok sa ciudad sang Kabankalan apang siyam ka tuig na nga nagapuyo sa Purok Ilaya, Barangay Cabug, Bacolod City upod sa iya live-in partner kag kabataan.
Madumduman nga ang biktima ang nagbakal sang bugas kag nagpatughong sang butane cannister kag papauli na kuntani sakay sa iya Honda TMX 125 nga motorsiklo.
Apang sang ini ang nagpundo bangod may nagtawag sa iya, hinali ini nga ginbunggoan sang motorsiklo sang suspect, gani ini ang natumba.
Una nga ginpahayag sang witness nga minor nga nagluhod pa ang biktima sa atubang sang suspek kag naghambal nga ‘Kas indi ko pagtiroha may ginasagod ko nga bata’ apang naghambal ang suspek nga ‘wala ko labot bisan ano da ang imo problema’ kag siya ang gintiro sang duha ka beses.
Nakapalagyo pa ang biktima kag nagpadulong sa hilamonan kag ginsobsob ang iya ulo sa duta, apang siya ang ginsundan sang suspek kag liwat nga ginluthang sang ginabanta tatlo ka beses.
Nakabaton man sang impormasyon ang Bombo News Team nga anay militar ang biktima, apang sa karun nagatrabaho bilang security guard sa isa ka pribado nga kompanya.
Sa interview sang Bombo Radyo Bacolod kay Police Captain Glenn Montaño, station commander sang Bacolod Police Station 10, ang biktima ang ginkilala sang iya nga live-in partner.
Isa sa ginatutukan sa karun nga motibo amo ang love triangle ukon personal nga dumot sa biktima, nga ginhingadlan lamang sini nga Alias Guard.
Suno kay Montaño, wala pa nila matumod kun may iban pa nga pamilya ang biktima, apang ang live in partner sini ang kasado sa iban antes pa sila maglive-in.
Nakita naman sa CCTV footage nga ang suspect ang sakay sa pula nga Bajaj nga motorsiklo.
Isa man sa ginatun-an sang mga ini kun may-ara pa nga kaupod ang suspect nga nagserbe nga look-out.
