Ang atun pangalan ang tuman ka importante sa atun gani nagalalain ang pila sa atun kun mamispronounce kag mamispell ang pangalan apang paano kun ang ginpangalan sa imo sang imo ginikanan “HAPPY” mangin malipayon ka man bala?
Sa Japan, may isa ka lalaki nga ginhingadlan nga “HAPPY” apang wala ini nalipay sa iya pangalan.
Ngaa? Sang ginbun-ag ang lalaki ginhatagan siya sang iya iloy sang pangalan nga Happy bangud sa kalipay nga sila ang ginbugayan sang anak.
Apang ang masubo sang nagdako ini, madamo na ang nagasunlog sa iya kag ginakadlawan pa ini.
Ang pagbully sa iya nagpadayon bisan nga yara na siya sa high school kag kolehiyo.
Bisan sa iya lovelife, malas man ang dala sang iya pangalan.
Mangin sa iya pagpangita sang trabaho, wala man siya ginaseryoso sang kompaniya nga iya gina-applyan bangud sa iya pangalan.
Maayo lang nga may isa ka kompaniya nga naghire sa iya bangud ginkabig ang iya pangalan nga good omen kag nakapangita siya sang trabaho.
Sa pihak sini, tubtob subong, indi sagihapon matago ni Happy nga wala siya nalipay sa iya pangalan.
Nakapaminsar pa ini nga paislan na lamang ang iya pangalan apang indi man sini luyag nga maglain ang buot sang iya iloy.
Matapos nga naglapta sa Japan ang iya istorya, madamo naman ang nagpabutyag sang suporta kag gin-engganyo ini nga mangin positibo gihapon sa kabuhi kag ikabuhi ang iya pangalan nga HAPPY.
