Nakilala na ang lalaki nga ginbuno tubtub mapatay sa sulod sang payag-payag sa Villa Rosario Street, Barangay Alijis, ciudad sang Bacolod kag nasapwan sang isa ka vendor kahapon sang aga.
Sa interview sang Bombo Radyo kay Police Capt. Edward Bolivar, station commander sang Bacolod Police Station 7, ang biktima ang ginkilala kay Alex Dolorosa, 35-anyos, call center agent kag residente sang ciudad sang Cadiz.
Suno kay Bolivar, si Dolorosa ang gin-identify sang iya abyan bangud nagaboard ini sa Barangay Taloc, ciudad sang Bago kag nagatrabaho diri sa ciudad sang Bacolod bilang call center agent.
Sa karon, ginahibalo pa kun may dala nga motorsiklo si Dolorosa antes ini ginpatay ukon nag-angkas lang ini sa iban nga tawo, kag kun may motorsiklo man, sin-o ang nagkuha sini.
Suno sa abyan sang biktima, miyembro sang LGBT community si Dolorosa.
Ginpahayag man sang abyan sini nga wala man siya sang kontra antes natabo ang krimen gani ginatul-id pa sang otoridad kun ano ang rason kun ngaa ini ang ginpatay.
